طريقة عمل الفراخ المشوية فى الفرن والسر فى التتبيلة
الفراخ المشوية

الفراخ المشوية أكلة كتير حلوة ولذيذة ومفضلة عند كتير مننا ، بنحب ناكلها فى أى وقت من حلاوتها وطعامتها ، وياسلام بقى لو إنتى اللى عملاها بإيديكى ،أهل بيتك هيحبوها منك وهتبقى أطعم والذ ،
والسر فى تتبيلتها ، ومصر 365 هتقدملك سر الفراخ المشوية فى الفرن ، وتطلع زى اللى بتتباع بره بالظبط .
نبدأ بالمقادير
1-فرخة مغسولة ونظيفة من جوه كويس أووى
وهنقولك فى الآخر إزاى تغسلى الفراخ كويس ومش يكون ليها ريحة ولا فيها بواقى دم .
2-علبة زبادى

3-بصلة كبيرة مبشورة
4-فصين توم مهروسين
5- شوية نعناع أخضر مطحونين أو ورق النعناع .
6-التوابل والبهارات كلها
“زنجبيل ، فلفل اسمر، كمون ، ملح ، قرفة ، شطة ،  كزبرة ناشفة ،توابل فراخ ”
وحطى منها حسب رغبتك .
7-ثلاث معالق كبيرة خل
8-ثلاث معالق كبيرة زيت
9-معلقة صلصة طماطم

10-فصين فلفل اخضر مقطعين مكعبات
11-شوية كزبرة خضراء أو بقدونس متقطعين .
تعالى بقى أقولك تعمليها ازاى
1-هتخلطى كل المقادير اللى فاتت دى مع بعضها وهتحطيها ع الفرخة وجواها كويس أوى .
2-سيبي الفرخة فى التتبيلة ساعتين ع الأقل ولو حابة تسيبيها أكتر من كده يكون أفضل ممكن تتبليها من باليل وتعمليها ع الغدا تانى يوم .
3-لو هتعمليها فى شواية الفرن ، هتجيبي سيخ الشواية وتدخليه فى الفرخة زى ما بتشوفيها فى شويات بره كده ، طبعاً بعد ما تكتفيها .
وتحطيها فى الفرن ، وطبعاً هتحطى صينية تحتها علشان الشوربة اللى بتقع منها بيكون طعمها حلو اوووى .
ولو مش عندك شواية ، ممكن تحطيها فى صينيه وتدخليها الفرن ، بس مش تسيبيها لوحدها ، كل خمس او عشر دقايق بصى عليها وقلبيها .
وياسلام بقى لو قطعتى بطاطساية تحتها فى الصينية ، طعمها ولا اروع .

4-سيبيها فى الفرن لمدة ساعة .
5-طلعيها وهى سخنه وحطيها فى طبق التقديم وزينيها بشرايح طماطم أو خيار وقدميها مع الأرز الأبيض أو المحمر ، وطبعاً سلطة طحينة ، وسلطة خضراء ، وشيبسى .
وبالهنا والشفا