نصائح لحياة زوجية سعيدة

اهلا ومرحبا بكم زوارنا الكرام موضوعنا النهاردة عن الحياة الزوجية وازاى نحافظ عليها ونبتديها صح وعشان كدة بقدملكم النهاردة مجموعة النصايح دى اللى هتفيد كل المقبلين عالجواز واللى لسه متجوزين قريب تعالوا نجيب الموضوع من اوله لازم نبدا بالتوعيه من خلال البيت اهلنا طول عمرهم نفسهم يشوفونا دكاتره ومهندسين وظباط مين فى اهلنا من واحنا صغيرين بيربينا على اننا نكون اباء مثاليين او امهات مثاليات ؟؟
لازم الموضوع يبدا من البيت واهلينا يبدئوا يكونوا قدوه لينا ويربوا فينا من واحنا صغيرين زى ما مهم اوى انى اكون مجتهد فى دراستى اكون كمان مجتهد ف بيتى ومع شريك حياتى عشان كدة دى  شويه نصايح عشان نبدأ حياتنا صح
1-لازم تعرف احتياجات الطرف الاخر مثلا لو عندك ارنب وجبتله بيتزا وهوت دوج وايس كريم وكباب وكفتة هيبقى كده انت اكرمته وعملتله الى هو عاوزه ؟؟؟ طبعا ولا كانك عملتله حاجه – رغم انك تعبت فعلا عشان ترضيه بس لو جبتله شويه جزر وبرسيم .. بالنسباله انت عملتله كل حاجه واكرمته جدا .. رغم ان بالنسبالك معملتش اى حاجه مش مهم انت بتعمل ايه علشان الطرف الاخر المهم هو بيحب ايه ومستنى منك ايه لان ده ممكن يكون سهل جدا بالنسبالك وانت مش واخد بالك وبتتعب عشان تعمله حاجات تانيه هو مش واخد باله منها
2-لازم تعرف ان شريك حياتك شخص مختلف عنك وانك مش هتلاقى حد شكلك فى كل حاجه المهم وانت بتدور تدور على حد يكملك يعنى لو انتوا ال2 بتحبوا الكلام يبقى مين هيسمعكم ؟؟ولو انتوا ال2 بتحبوا تسمعوا مين هيتكلم معاكم ؟؟مش معنى كلامى انك تدور على حد عكسك تماما المهم يكون فى تكامل ما بينكم فى الصفات
3-حاول مسح كل الصور السيئه عن الزواج من ذهنك سواء كانت من قصص غير ناجحه او من مسلسلات
متاخدش نصائح من شخص غير موثوق فيه وتقلد تقليد اعمى لان من المنطقى ليس كل ما ينطبق على غيرك ينطبق عليك
قصه : بنت بتعمل سمك مع صحبتها فلاحظت ان صاحبتها بتقطع الراس والديل قبل ما تقلى السمك
فسالتها انتى ليه بتقطعى الراس والديل قبل ما تقلى السمكه؟؟ فقالتلها .. معرفش !!.. بس ماما علمتنى اعمل كده
فسالوا مامتها فقالتلهم لازم طبعا اقطع الراس والديل .. فقالولها ليه برده ؟؟.. قالت معرفش بس ماما كانت بتقولى لازم تقطعى الراس والديل
سالوا جده البنت ليه كنتى بتقطعى الراس والديل قالت علشان الطاسه ( القلايه ) الى كنت بقلى فيها السمك كانت صغيره فمش بتاخد السمك الكبير فكنت بقطع الراس والديل قبل ما احط السمك
العبره : ان رغم السبب اتغير والطاسه كبرت ولسه بنقطع الراس والديل انه التقليد الاعمى يا ساده
فمتسمعش كلام حد الا لما تشغل دماغك
4-حدد هدفك من الجواز فى ناس بتشوف ان الجواز شهوه جنسيه وفى منهم الى بيشوفه سبيل للانجاب والتفاخر وفى منهم الى بيشوفه فرصه للسيطره وفى منهم الى بيشوفه فرصه لاعفاف النفس وفى منهم الى بيشوفه عاده اجتماعيه يتوارثها الاجيال وقليل منهم بيشوفه أنه رسالة! ومسئولية كبيره، وتعاون مستمر، وتضحية دائمة في سبيل إسعاد البشرية وتوجيهها إلى الطريق السليمفلازم نحدد اهدفنا من الجواز ونتفق مع الطرف الاخر على وجود هدف مشترك من الجواز
5-الجواز مش هو الطريق الى هتخرجكم من قيود بيت العيله يعنى متفتكريش ان لما تتجوزى انتى كده بتخرجى من سيطره بابا وماما وتحكماتهم فيكى فتقومى تتجوزى اى جوازه وتوافقى على اول عريس هيجيلك وفاكره بق انه هو ده الى هيخرجك ويفسحك ويلففك الدنيا ده انتى رايحه فى طريق كله مسؤليات ف متتسرعيش انك تخرجى من بيت اهلك الامع حد هيعينك على المسؤليه دى
6-احسنوا الاختيار

7-هى مش ليكم هى لاولياء الامور الصراحه نصيحه لكل اولياء الامور متتغطوش على بناتكم وتسيطروا عليهم لدرجه انهم يحاولوا يتجوزوا علشان يهربوا من بيت العيله الى عش الزوجيه وهما تحت عنيكم سيبوهم يخرجوا ويتفسحواومتفهموهمش انهم هيعملوا كل الى نفسهم فيه بعد الجواز وفى نفس الوقت تعلموا ابنكم انه يتفسح ويخرج ويعمل كل الى نفسه فيه علشان لما يتجوز هيستقر بق وهيرجع من البيت هيلاقى كل حاجه جاهزاله فهنا اى عريس و عروسه بيتقابلوا فى نقطه غلط بسبب نظره ومفهوم كل واحد عن الجواز الى اكتسبها من البيت هى هتتجوز عشان تخرج وتتفسح بعد ما قفلت على نفسها قبل الجواز
وهو هيتجوز عشان يستقر بعد ما عمل كل الى نفسه فيه قبل الجواز علم ابنك المسؤليه من صغره وانه يكون راجل وانه ميخرجش من البيت طالما انت مش موجود وانه ميضربش اخواته البنات وانه ميعاكسش بنات الناس عشان تقوله والله وكبرت وبقيت تعرف تعاكس ياواد من الاخر انه يكون راجل وعلموا بناتكم يعنى ايه بيت واسره ومسؤليه علموهم “كلكم راع ومسؤول عن رعيته” ويارب الناس كلها تستفيد