المشاكل اللى بتقابلنا واحنا بنختار شريك حياتنا
شريك الحياة,المشاكل الزوجية,الرجل والمرأة ,الزوج والزوجة,الحياة الزوجية

اعزائي زوارنا الكرام هنتكلم النهاردة عن المشاكل اللى بتقابلنا واحنا بنختار شريك حياتنا يعنى الاخطاء اللى بنقع فيها واحنا بنختار وده بيكون لاكتر من سبب منهم :
1- الهروب : “بسب الخروج من تجربه فاشله” لو كان عندنا تجربه او عايشين فى قصه حب ومكملتش لاى سبب من الاسباب ممكن نحاول نهرب باننا نتعرف على حد تانى او نجرب علاقه تانيه او نقبل اول عريس يجى بعد القصه اللى باظت ومنعرفش اننا كده هنظلم الحد التانى ده لاننا مش هنبقى مركزين معاه هنبقى بس بنحاول ننسى الاول او هنفكر بعقلنا بس ونقول خدنا ايه من الحب نجرب العقل بس انتاو انتى مش لو حصل حاجه زى كده لازم تاخد فتره تريح فيها اعصابك وتنسى علشان تعرف تستقبل علاقه جديده لان الانسان اللى هترتبط بيه ملهوش اى ذنب باى حاجه حصلت قبل كده .
2- التسرع : اننا نتسرع فى الحكم على شريك حياتنا علشان كل واحد نفسه يلبس البدله وكل بنت نفسها تلبس الفستان الابيض فعلى ما نصدق فرصه تيجى ونتعلق فيها ونقول موافقين من غير لما تشوف يا ترى الشخص ده مناسب ولا لا؟ .. هو ده الى هيكملنى ولا لا ؟ نصيبك هتاخده هتاخده ان شاء الله فمتتسرعش وخت وقتك فى الحكم على شريك حياتك .
3- شبح العنوسه : عشان نكون منصفين ده عيب مجتمع مش عيب فينا مثلا طنط فلانة اللى كل لما تشوفك تقولك ها !! مش هتشدى حيلك؟ مش هنفرح بيكى؟ وهى كل بناتها مفرحتش بيهم ولا عرفوا يشدوا حيلهم ..بس بدل احنا كلنا عارفين انه عيب مجتمع ليه تكونى سلبيه او تخليه يهزمك وتحاولى تهربى منه بانك تتجوزى جوازه وخلاص لما طنط دى تقولك مش هتشدى حيلك قوليلها انا بشده كل يوم فى شغلى وفى دراستى وفى اهتمامى بنفسى وكونى واثقه ان مفيش حاجه اسمها عنوسه .. بس فى حاجه اسمها ان ربنا بعد عنك شر زوج غير مناسب .
4- مشاكل البيت : بابا اللى على طول بيتحكم وماما اللى عاوزه تخلص منك واخوكى الى مقيدك فى حركتك .. متحاوليش انك تهربى منهم لانك ممكن تروحى لزوج يعمل فيكى كل الصفات دى مجتمعين .
5- متسمعيش لتجارب اصحابك الفاشله : مش معنى ان واحده صاحبتك فى مشاكل مع جوزها وبتحكيلك المشاكل دى من باب الفضفضه فتتوقعى ان هيحصل معاكى كده انتى مش زى صاحبتك وجوزها مش زى اللى هيتجوزك اوعوا تقعوا فى الاخطاء الى فاتت دى وحاولوا وانتوا بتختاروا شريك حياتكم تركزوا وتختاروه صح علشان تعيشوا حياه سعيده .