مفاتيح وكتالوج التعامل مع الرجل
العلاقة الزوجية، الحياة الزوجية، شريك الحياة، الرجل والمرأة,الحياة الزوجية,مفاتيح الرجل,التعامل مع الرجل

اعزائي زوارنا الكرام هنتكلم النهاردة عن مفاتيح وكتالوج التعامل مع الرجل وازاى تقدري تفهميه وتتواصلي معاه وازاى على اقد ما نقدر نبعد عن المشاكل والخلافات اللى بيكون سببها عدم التفاهم وفعلا بيكون الطرفين مش غلطانين بس المشكلة بينهم انهم مبيقوش قادرين يفهموا بعض وعشان كدة بقدملكم مفاتيح الرجل وهى:
1- كونى أقرب أصدقائه :خليكى زى صاحبه الانتيم العبوا وهزروا مع بعض وشاركيه افكاره واهتماماته اتعلمى البلايستيشن حتى عشاه خاطره .
2- اهتمى بأنوثتك:أنوثتك سلاح مبيهزرش  فى الدلع والكلام الرقيق مفتاح قلب اى راجل فاستخدمى أنوثتك كسلاح أمام رجولته .
3- خليكى واضحة:الراجل دايما مش بيركز فى اى تفاصيل  فمتزعليش لو مخدش باله انك غيرتى تسريحه شعرك او انه مخدش باله انك حطيتى مونكير او شلتيه او خسيتى ولا تخنتى  متحاوليش تلفى وتدورى وتقولى الموضوع باكتر من طريقه عشان توصليهوله الرجاله سهله خالص والله عاوزه كذا قولى بس ومن غير مقدمات انا عارفة ان دة صعب لان طبيعة البنات انها بتلف حوالين اللى هى عاوزاه عشان هو يفهم لوحده ويعمل الحاجة من غير لما تطلبها لان احساسها بيبقي افضل بس معلش هم الرجالة مبيفهموش الكلام دة وعاوزين الحاجة تتقالهم وش كدة .
4- التسامح :ودة مهم جدا عشان الراجل بيحب المراه المتسامحه  فمتتعصبيش على كلمه اتقالت او موقف حصل وتنسى كل المواقف الحلوه اللى بينكم افتكروا انكم فى مركب واحدةومش عشان موقف او كلمه اتقالت تقعدى تفتحى وتلومى على حاجات من ايام الخطوبه .
5- ما تحليش مشاكل :لو حصل نصيب وقعد معاكى وقعد يفضفض عن مشاكل الشغل فمتتعبيش نفسك وتقعدى تدوريله على حلول هو عاوزك بس تسمعيله واياكى تلوميه وتقوليله مش قولتلك اعمل كذا
لان لو لومتى كده ابقى قابلينى لو حكالك حاجه تانى .
6- متنتقديش :اوعى تنتقدى تصرفاته ولا لوحدكم ولا قدام حد كرامته خط احمر ومينفعش كل شويه تقوليله لا ده صح وده غلط هو مش عيل صغير وهو عارف الصح من الغلط حاولى تجيبيهاله بطريقة تانية مفيهاش نقد ولو ما فهمش مش مشكلة هو هيتعلم من أخطاؤه.
7- متأمريش :الراجل مبيحبش يسمع لغه الامر ومبيحبش تقوليله يعمل ايه وميعملش ايه ممكن تستخدمى لغه الطلب بدل من لغه الامر ممكن تقوليله ممكن لو سمحت تعمل كذا  بدل من اعمل كذا .
8- متشتكيش من قلّة رومانسيته:كتير من الرجاله بيعبر عن حبه بالافعال ومعظمهم مبيعرفش يقول كلام حلو  فقدرى مجهوداته عشان يسعدك ومفيش راجل هيسيب مسؤلياته علشان يقعد يقول شعر فيكى .
9- اتعلمى الاحتواء :جوا كل راجل طفل صغير بيدور على الاحتواء فإحساس المرأة بجوزها هو احسن طريق فى الوصول الى قلب الراجل وعقله وبالطريقه دى هتخليه يتمسك بيكى لنهايه العمر :
10- حسسيه انه سى السيد :مش غريب على الراجل الشرقى أن تكون الطاعة مفتاح قلبه كل لما تطيعيه كل لما يحبك  وحسسيه انه سيد البيت وصاحب السلطه وحتى لو فى جدال يكون بطريقه مفيهاش ولا تحدى ولا غرور .
11- احترمى انشغاله :متعاتبيهوش لو متصلش بيكى فمسؤلياته ممكن تكون اكبر من توقعاتك  ومتقلبيش الدنيا لو نسى تاريخ مهم فى حياتكم متحاوليش تزعجيه لو حب يقعد لوحده .
12- اطلبى مساعدته : كل راجل بيحب يحس أنه البطل فى حياة مراته خليه يحس بمدى احتياجك ليه واطلبى رأيه فى كل الامور الراجل بحب يحس انه سندك وأهم حاجة فى حياتك وانك دايما محتاجاله.
13 -ما تقيديش حريته :سيبيه يخرج مع اصحابه وسيبيه يشتاقلك لان البيت بالنسباله مسؤليه فهو لما بيحب يبعد عن البيت هو مش بيهرب منك على قد ما هو بيحب ياخد قسط من الراحه عشان يعرف يكمل وربنا يديمها نعمة عالناس كلها ويرزق الجميع بحياة سعيدة بدون مشاكل وشكرا.